ဂျူနီယာ မှတ်စုများ

ဘာလိုလိုနဲ့ ၁၄ ပတ်ဆိုတဲ့ အချိန်ဟာ ကုန်ခါနီးပါပြီ။ ၄ ပတ်ပဲ ကျန်တော့မယ်။ အဲဒီအခါကျရင် အင်တာနက်ကို အရင်လို ပြန်သုံးနိုင်ပြီပေါ့။ မီးလာရင် ပြီးတော့ connection ကောင်းရင်ပေါ့လေ။

၁၀ ပတ်ကုန်သွားတဲ့ အချိန်နောက်မှာ ကိုယ့်ကိုကိုယ် ပြန်ဆန်းစစ်ကြည့်တယ်။ ဘာတွေ အကျိုးရှိလာသလဲ လို့။

ကိုယ်အလေးချိန် ကျသွားပါတယ်။ ၁၀ ပေါင်ကျော်ကျသွားတာပါ။ ပြီးခဲတဲ့ နှစ်ဆန်းပိုင်းလောက်က စဝလာလိုက်တာ သင်တန်းမတက်မီ အထိ ကျနော် ၁၃၁ ပေါင်အထိ ရောက်သွားပါတယ်။ အခု ၁၂၀ လောက်ပဲ ရှိပါတော့တယ်။ လေ့ကျင့်ခန်းတွေ မှန်မှန်လုပ်၊ အချိန်မှန် လမ်းလျှောက်ရတာတွေရဲ့ အကျိုးကျေးဇူးပေါ့။ အစားအစာ စားမကောင်းလို့ မစားနိုင်တာလည်း ပါပါတယ်။

စာကျက်ဖို့ အစပျိုးဖြစ်ပါတယ်။ အဆောင်က hall type ဆိုတော့ စာကျက်ရတာ အာရုံ စူးစိုက်မှု မရပေမယ့် နည်းနည်းတော့ ကျက်ဖြစ်ပါတယ်။ စက်တင်ဘာ မှာ ဖြေရမှာ ဆိုတော့ နည်းနည်း မြန်မြန် ဖတ်ဖို့တော့ လိုတာပေါ့လေ။

လူတွေနဲ့ ပိုဆက်ဆံဖြစ်ပါတယ်။ အရင်က လူနာရယ် ဆရာဝန်ရယ် အလုပ်သမားရယ် မိသားစုရယ် သူငယ်ချင်းတွေရယ် ဒါတွေနဲ့ပဲ တွေ့ထိ ဆက်ဆံနေတာကနေ အခုတော့ နေရာအနှံ့က အရာရှိအမျိုးမျိုးနဲ့ ဆက်ဆံရတာပေါ့လေ။ နည်းနည်း အခက်အခဲ ရှိပေမယ့် မဆိုးပါဘူး။

Presentation skill တက်လာပါတယ်။ Discussion တွေမှာ ရှေ့ထွက်ပြီး များများပြောဖြစ်တယ်။ ဘယ်လို ပြောရင် ဆွဲဆောင်မှု ရှိလဲ။ ဘယ်လို ပြင်ဆင်ရမလဲ စသည်ဖြင့် အရင်ထက်တော့ ကိုယ့်ကိုကိုယ် ယုံကြည်မှု ပိုလာပါတယ်။

အနားရပါတယ်။ အလုပ်ကနေ ခဏ အနားရပါတယ်။ စိတ်လွတ်ကိုယ်လွတ် မဟုတ်ပေမယ့် အလုပ်မှာ ရှိတဲ့ စိတ်ဖိစီးမှုတော့ နည်းနည်း လျော့သွားတယ်။

ပိုတွေးဖြစ်ပါတယ်။ အနာဂတ်အတွက် ဘဝအတွက် ကိုယ်ဖြစ်ချင်တာ ကိုယ်လုပ်ပေးချင်တာ ကိုယ်ယုံကြည်တာတွေကို မျှတအောင် ဘယ်လိုလုပ်မလဲ ဆိုတာ ပိုနားလည်လာတယ်။ အရင်လို တဇွတ်ထိုး လုပ်ချင်ရာလုပ် ပြောချင်ရာပြောလို့ မရဘူးဆိုတာ ပို နားလည်လာပါပြီ။

ကျနော့ Consultant က ပြောဖူးတယ်။ “Life depends on your perspectives” တဲ့။ အရင်က နားမလည်ခဲ့ဘူး။ အခုတော့ နားလည်သွားပြီ။ ဘယ်လို အခြေအနေမှာပဲ ဖြစ်ဖြစ် ကိုယ်အနေနဲ့ အကျိုးရှိမယ့် အရာကို အချိန်သုံးတတ်ဖို့ပဲ လိုတယ်။